button Lidmaatsjap (25K) Button Repertoire (24K) Button fotomap (24K) button carnavalslinks (24K) button stuur email (25K)



Vanaaf de oprichting toet noe

             Eine fijne vastelaovend, Alaaf

Vastelaovend 1995. Ein sjtel vrunj sjtaon in Remunj  oppe Sjuiteberg nao d’n optoch te kieke es aan de angere kantj van de sjtraot ein plaatselikke Zaate Hermeniej häör oeterste bes duit óm alle luuj, die nog sjtil sjtaon in bewaeging te kriege.

Al jaore is der euver gekald óm auch zo get te beginne, maar esse allein maar wits det der op ein träöt 3 knuup zitte, dan hilt ’t al sjnel op.

Men ging raodplege biej femilie van eine in Puth, want dae had al eerder auch zo’n kepel opgericht en dae wis wie det mós. Veel det auch taege!

Veer móste maar ins eers eine groep biejein kriege diej ein instrument wólle koupe, note wólle lere laeze, en ós d’r op veurbereije det ’t waal 2 jaor zou doere, veur det ’t örges op begós te lieke.

Effe zónk ós de mood in de sjoon. Maar ja, de wils get.

Zo woord in vrunje- en kinnesekrink geinformeerd wae zin had óm ein hermenieke te beginne. Oeteindelik haje veer 10 miense biejein.

D’r woord ein vergadering biejein gerope, veur eine naam te verzinne, de kónterbuusie vas te sjtelle, en op ein paar geleende instrumente te kieke waem waat ging sjpele. Väöl keuze waas d’r neet.

Tuba of trompet.

Det daobiej auch get gedrónke woord, sjprik vanzelf. Nao gelang de aovend vorderde, zag eine: "Es veer zo wier gaon, höbbe veer aan ein krat neet zat." De naam waas gebaore!

Ein van de leje had eine grote kelder ónger zien hoes en dae sjtelde hae besjikbaar es rippetiesiejruumte. D’r woord nao Melick getrokke wo eine J.J. tweedehands muziekinstrumente verkoch. Ein waek later waore veer aan de gang. Veer sjrieve naojaor 1995.

Mit sjtökskes en bietjes woord de lat sjteeds get hoger gelag en in 2002 zoot d’r ein blaoskepel van 26 muzikante diej ein net deuntje kóste blaoze. Maar auch hiej kwaam ’t onvermiejelikke.

Ein aantal oprichters kós zich neet meer vinje mit de gang van zake en op de vergadering in november 2002 vondj ein aafsjplising plaats.

Ein Krat Neet Zat is trök nao zien roots.

Opgericht veur de vastelaovend en ein fees.

Sjpas en plezeer  veurop en dan de lat maar get leger.

Nog sjteeds is “ein krat neet zat”!

                             Eine fijne vastelaovend, Alaaf